Shakun shar i sentat k'un amik gada sar as un id solya, spansanda bril totume; e plus nos par, les nos elgar, fi d'et mond un palaso o un prizo.
Viv shar si mezurat pe penso e aktado, no pe tempo. It certe par, e shur si, klara, interesa e ixa; den, les l'itala proverb "es tos no par vivi ol Plas, shakun par senti lo solyo".
Es un vir malixa, sovenu ke la malix sa kulpo; den Deo fir tot viros senda ixa. — Mi sem kontenta kon lo ki oxar; den mi pensar ke lo ke Deo elgar mela qam lo ke mi elgar.
Es nos ne separar tan dal interesos de zi ki ne umar us no pati kon za sofros, nos ne exkludar da parti za ix e perdar plu qam nos ganar. Es nos evitar simpatio e ne involvar in un friga blindo d'egoismo, nos ne exkludar da mul intel granesta e puresta joyos de viv. Ne fande nosensibla a pen, nos shar an perdi lo posibleso d'ix.
Po plus nos, no sar tan lo gran penos, egro, o mort, mo pluye lo let "shakida kontralos" ki ne skelar lo solyolum de viv. Mul na penos sar senvika in soself, e pur ize si evitat.
Gre nos ar un firma spero de progres pol oma ras, dok, asdus l'om koncernat individue, avansande in ajo nos zorgar minmine pri kozos ki in na yuno ne dir lo granesta plazo. Oselte, es na tempo sir utat bene, es nos sage varmir amba manos "al fok de viv", nos par gani plu qam nos perdar. Dun na forto minar, nos sentar an min neso d'exerco. Spero gradele riplasat pe soven, e lo k'etun adar o no a na ix dependar da lo ke na viv sir.
As l'id-endo, same l'endo de viv; ye par si nubos, mo, es l'orizon klara, lo ser par si splenda.
Viv no axeptibla es so no admitar et du axiomos: to posibla e tos raga. (Nos modifiku live et dua axiom e dicu: "e shakun epe raga". )
Askan paradoxa it pur pari, jensos de pesimista natur plu malixa van to gar ben qam van to gar male. Den, van to gar male, zi ar pomine somo dey lamenti, e lo spero d'un ritorno del mel cirkonsos dar a zi un lucel d'ix; dunke, van to gar ben, za natur ze portande dok a gemos, zi lo vera imago de malix sen sper.
Es mi shur kondensi l'ent erfaro de ma viv in un sol formul, mi dicur: "restu yuna!". Il ki par servi sa kor d'infan e spirto-yuneso tror lo veg de suxes e ix. Resti sem un student, sem plena de kuryozeso e del joy de vivi, em lo sekro del persona devolvo.
Un vir spirtola pir dici: "so shar morti yuna, mo tardeste posibla".
... Mi of pensir ke lo moment van nos cesar si vere yuna, sar van lo pezo de sovenos jar plu ceva qam lo del speros. E dok eto no certa, e so par, kon pok spero, servi nok un kor muy yuna.
Ah! kan lo limitos de yuneso dufdefenibla! Zi varyar les lo seos, so pur uske dici les l'idos.
No comments:
Post a Comment