Pilotos de Granpremyos se elevar kontre lo nuv reglamentazo: CPDN 183

Folge l decid prat pel internasyona sporta komiseyo del autas sportos, dun la last riun in London, de limiti l cilindrado del kursveturos de « formul I » a 1.500 cmk po un pezo minima de 500 kg, Harry Schell, in nam del Unyon del profesas pilotos e del xenas konstrueros, konvokir yer mirko los jornalistos specalat.

« Nos ne elevar kontre et decid ki evor nor lo dango nor l axidentos, deklir notye Harry Schell.

« Es lo kurso sar vere danga, no sar in 1961, mo ilke, ke nesar it fermi.

« Fonde, so var ne impozi un vitlimitazo, mo oselte nil decid ar sat prat pril veturos « sport 3 litros », ki gor plu vit as los « formul I ». Et falsa situo ne obligar protesti.

« Kol apogo del xenas konstrueros, precisir Schell, nos askar lo problem si revidat e korexat, den ose l Unyon del internasyonas pilotos se vidur nel obligo de fondi un fed dikuna. Nos organor dan na prop mondkampyonado, in iskuin garyos. Los konelpos ne sar sekurat. Italyo ofrar los cirkuitos de Pescara, Naplo, Bari, e Anglo eos de Silverstone, Aintree, ec. L apogo del Usanos, ki se interesar pluplue al kompet, sar sekura. »

(dal « Monde » de 14 Novembro 1958. )