9/05/2010

OPTIMISMO E PESIMISMO: RMON 105, 107

Semtempe lo spirtos cinika, negera de kel beleso e noaxedibla a proxamo mokir l'optimistos. Zi en fir sa kaprocef, as es zi vur se vengi de fakto ke zi vidar l'optimistos godi d'un ix ke ziself ni konor.

Zi eselar pleki eto dicande ke l'optimist sar un duma ki vidar beate viv sub un aspo iluda e ke belidyes il skopror l'absurdeso de viv, kador e se rompor lo kol.

Eh ben, tote lo kontra oxar.
Lo vera optimist no sar un beata noprevidema. Gre an il konar lo turpa-dos de viv, il plenlucide elgar un viv-art konstruifa. Il previdar lo mal e tralar ye pargi. Il endar sa idos nel joy in keo il sem vivir, ixa aminde sa proxun e spansinde ix um so.

Ko oxar akontre al cinika ? Etun of tala in kontredico kon sa intima natur, pe un duma konformismo kol med ki l'umar. Pe pav de sa,, kompa-nos", il raligar lo negeros e lo nilferos. Van il no endar pe suicidi — lo ki po il fonde lo plu logika — il deskadar idide e jar l'imago selfa de ladeso, gronande matinsere e kirande in obsheneso, van no in krim, un dispera rifugo.

Optimismo e pesimismo sar reale un opto, un elgo ke l'om far sape van il nok yuna. Et elgo decidar Foryentazo de la viv. Lo pesimist jar cinika e delera; l'optimist sar konstruifa e realar lo maxim d'ix po soself e po sa proxun.
Goethe dicir ke lo prim dov d'un om ver sa proxun sar si ixa.
Un korespondent ne ramemar ke les Eraklit lo mond sar tala ke lo mal shar ye koexisti kon ben. Il en dedukar ke lo pesimistos shar ye koexisti kol optimistos.
Es ete, nos barmu lo pov pesimistos, kondanat groni e sekreli vinagro.
E nosself siu joya, nos laboru — labor lo prim sorgo d'ix — e nos fiu lo ben. Elgande Lum e Joy, nos sor exe portado del klabos del qasheros ki se delektar in skuro e fango.

A. 

No comments:

Post a Comment