9/10/2010

Lo Nuv Modyo de Yem 1959: CPDN 185

Sar nel kapitro del jupos ke ye sar somo nuva. Un certeso: 1 efektos de tunik sor modyas e et modyo plor. Tensado d antegardo: lo fluso a zunoalto on fluidas kokteltunikos. L ante-gardo far gridi nel mezur in keo it sorprenar. So no mankir aserti ke et lin sir senende tro ozat po pli. Nos precisi ke it sir prezentat on un manekin-viden, fem leta e minsa. Nos no en konkludi dete ke et tunikos sar vetat al femos granas. Zi lor nel modyo un impiont plu as durabla.

Vu no kambi lo longo de vas jupos. Inte un nekta kurtazo prekonizat pel unos e un longazo skisat pel osunos, « Vogue » sujelar lo « statu quo », cet 44 cm dal suol. Notenda ke lo parisa Altakud nel ento ristar favora a un modyo kurta, yuna, alersa. Vu spi ke 1959 sar un gran anyo pol mantos. En ezistar un varyeso nokredibla. In et domen, nil veto; to ki ve tentadar sar modya: texayos plushas, bifacas, skotas. Al antegardo del mantos, os tensado muy in favor: un katrado stofat e kolelos involveras.

Nel kapitro del talyoros, los vestelos ezistar in tre longos: ultrakurta, medya, longa. Nos konstati et koezist, sen dete parli de kontroverso, den lo vestel kurta ezistar dep long. Nos it vidar ja dep kuar sizos akompananda modelos yunas, jupos dritas au plisas. In et domen, sar un bon kono de va siluet ki guidor va elgo. Notenda ke lo vestel longa sar un lin konselenda prife al femos granas e minsas.

« Vogue », Paris, Septembro 1959.

No comments:

Post a Comment